التعليقات على: مين عندو وصفة للحزن و الأسى؟

بواسطة: najwa

najwa — Sun, 06 Apr 2008 10:39:31 +0000

تعرف بحياتي ما تمنيت الحزن لحدا
كيف اذا كان فراس أخي
و عزة سيدنا محمد بتمنى لو انو كل هم قبل ما يزورك يمر لعندي بلكي باخد منو الغم و الحزن و ببعتلك ياه احلى ضحكة يا صاحب احلى ضحكة ..
اختك المشتاقة نجوى

بواسطة: فراس

فراس — Sun, 24 Feb 2008 20:05:20 +0000

الحال عند بعضه أخي قرفيص .. أشكر مرورك الكريم من هنا.

بواسطة: alaa

alaa — Sun, 24 Feb 2008 12:30:57 +0000

سلام على صاحب الدار وعلى جيرانه

بصراحة يا خيي لا يوجد لدي أي تعليق مفيد

لأنني بحالة يرثى لها من كثرة الهموم و الاشغال

ولكنني لم أشأ الخروج كما دخلت و إن كان بتعليق بسيط

واقول حالك من بعض ما عندي

سلام لك

بواسطة: أبو السمر النمر

أبو السمر النمر — Fri, 22 Feb 2008 17:52:32 +0000

أيوااااااه.. الخيمة عند الوقت… معك كل الحق.. الوقت أهم شي.
وأنا كمان خيمتي قرية عالرزنامة … عيطلي صوت تشوف كني بسمعك….. أي سمعتك…. أي أي سمعتك… ماضل حدا ما سمعك خيي فراس

تحياتي الحارة إلك

بواسطة: فراس

فراس — Fri, 22 Feb 2008 14:34:31 +0000

أهلا و سهلا بك في مدونتي أخت سما. و أنا ألي الشرف أن يكون أو تعليق لك هو في مدونتي.
إن شاء الله أول موضوع ألك رح يكون في مدونتك. أنا بجهزلك ياها و أنتي أكتبي فيها. هذا وعد.
شكرا لنصيحتك . اعتقد ان الجميع قد أجمع على ضرورة الإنعزال بالذات بعيداً عن مجريات التاريخ. رح جرب أنعزل بشي ملجئ بعيد و أختفي قليلاً عن الناس. ما رح أخد معي اركيلة, صرلي شهور ما أركلة.
رح أخد معي كتابي و قلمي
شكرا لتعليقك
أخي أبو السمر . دخلك وين افضل مكان في المدونة لنصب الخيمة فيها.
يا رجل ما عجبني و لا محل غير عند الساعة - على اليمين - و تحت الروزنامة

بواسطة: smaali

smaali — Fri, 22 Feb 2008 09:19:45 +0000

صباحك سكر فراس

دوما اي مشكلة جسدية علاجها اسهل من علاج المشاكل النفسية والروحية..
كلنا نعاني من ضغوطات نفسية ونحتاج لاحد يسمعنا
برأيي أفضل حل اذا ماعندك احد يستمع الك..
التأمل وصفاء الروح لبضع دقائق يكون بلسم للروح او مسكن خفيف ربما
صدقني ابتعد شوي روح مشوار وحدك انعزل شوي وتأمل تشعر براحة افضل وتكون قادر على تقييم مشاكلك ووجود حلول الها
وابتعد عن الاركيلة …

هيدا اول تعليق الي يعني شرف كبير الك اني علقت عندك
(اضحك شوي )
بعدي ماعرفانة اعمل المدونة مظبوط انا جديدة هون
تمنياتي الك بصفاء وراحة نفس ..
سما

بواسطة: أبو السمر النمر

أبو السمر النمر — Thu, 21 Feb 2008 21:34:02 +0000

ههههه .. اي هه … قول هيك من الأول … قلي مين زاعجك تقوسو…

والله المنتدى بيجنن.. بيس بيلهي .. ومتل ماكان يقول جدي الله يرحمو ويرحم أموتكم أجمعين -بيلهي الكر عن لعيقو-
ولذلك إلي فترة ما بفوت عالمنتدى إلا لماماً.. واليوم بالذات فتت لأني ناوي ما أدرس

أما بالنسبة للخيمة والمتة والأركيلة.. فبتكون عملت عين الصواب… بس لا تعمل الخيمة بعيد كتير.. منشان فين نتساير

على عيني خيي فراس.. أركل خيي أركل.. ونفخ عليها تنجلي

بواسطة: فراس

فراس — Thu, 21 Feb 2008 21:24:01 +0000

شكرا أخي أبو السمر.
معك حق و صدقني طريقتك هي مو غايبة عن بالي. بس للأسف . إن بعض أسباب الضيق الذي يلاحقني هو عدم قدرتي على الابتعاد عنه ليومين أو ثلاثة.
بكل الأحوال بدي أسمع منك و جرب و رح ردلك خبر.
عجبني مثال اللي ذكرته أنت (تتضح الصورة كلما ابتعدنا عنها).

على سيرة المنغصات. لاحظت انك ابتعدت عن المنتدى و عم تقضي وقتك بالمدونة.
لازم سوي متلك. بدي ما بقى فوت على المنتدى هالأيام . رح أنصب خيمة و أركيلة و كاسة متي . و أقعد بمدونتي و صلى الله و بارك.

بواسطة: أبو السمر النمر

أبو السمر النمر — Thu, 21 Feb 2008 20:57:47 +0000

أيييييييييييييييه خيي فراس….

كلشي قلتو صحيح…. وأصح عبارة على الإطلاق -بالنسبة لألي عالأقل- هية:
أحيانا يكون ضيقك سببه بعض المحيطين بك, إما أنك لا تفهمهم أو أنهم لا يفهموك.

لأن كل ما بعدها هو شرح لها

شوف أخي فراس … ومن خلال تجربة شخصية بحتة توصلت للحل الأكيد..

معلش دخلك بالفيزياء شوي؟… بتذكر الثانوية شي أسمو مراقب خارجي نيوتن؟..
متل ما بتعرف .. المراقب الخارجي بيشوف الجملة بطريقة تختلف عن المراقب الداخلي… لأن الخارجي بيوصف الجملة نسبة للأبعاد والحالة الخارجية.. بينما الداخلي يسقط الإعتبارات الخارجية ويعتبر القوى داخلية فقط…

ضيعتك؟… طول بالك .. لا تعتبرني متل الأشخاص اللي وصفتين أنت فوق.. وصلي عالنبي… صليت؟ … ماسمعتك…كويس

بتسمع بالقول: تتضح الصورة كلما ابتعدنا عنها… يعني مو دائما لازم ندقق بتفاصيل الصورة لنوصل بالحل …

لهيك بشوف أنو الإبتعاد عن سبب الإزعاج والضغط النفسي لمدة يومين تلاتة ..أو حتى اسبوع.. وأثناء الإبتعاد فكر بأي شي ما إلو علاقة بمشكلتك … أو أتفسح.. روح ولو يومين تلاتة لعند حدا من أقاربك برا الوسط اللي مزعوج منو…
بس فيه شرط… قبل ما ترجع.. فكر بأسباب ضيقك وإنزعاجك… بهالطريقة بتتوصل لنتائج عقلانية أكتر بكتير من النتائج أللي بتوصلها لما بتكون مشحون…

أنا ما تعلمت هالطريقة إلا بعد ماجيت لهون… ونظرا لأني هون بتعرض لضغوط نفسية كبيرة خارجية وداخلية, ليك صرت خبير بهالطريقة..

يمكن أول شي تقول لحالك هالحكي تخبيص.. بس صدقني.. لما بتطبقها رح ترتاح كتير

وبهالطريقة بتلاقي حلول للأسباب الأساسية للضيق.. أما الأسباب الجانبية فبتزول بزوال الأساسية

حتى لاحظ أنو الرسول الأعظم -ص- كان يختلي كتير بغار حراء قبل الدعوة.. وكتيرين بيفضلو هالطريقة للرجوع إلى الذات.. أي إلى الصفاء.. وبتصور أفضل الحلول تأتي بعد الرجوع للذات..

معي بهالكلام أخي فراس؟